Երկու տնտեսություն և մեկ միջին ցուցանիշ. 6.7% աճ և գյուղատնտեսության պատմական անկում

Կառավարության երեկվա նիստում ՀՀ վարչապետը նշել է հետևյալը. «2026 թվականի առաջին կիսամյակում մենք ունեցել ենք արդեն ոչ թե տնտեսական ակտիվության ցուցանիշ, այլ ՀՆԱ-ի 6 տոկոս աճ» [1]։ Եվ նա իրավացի է, թվերը դա են ցույց տալիս. ազգային հաշիվների համաձայն՝ առաջին կիսամյակի աճը կազմել է 5.97%, իսկ միայն երկրորդ եռամսյակինը՝ 6.7%, ինչը գերազանցում է նախորդ տարվա նույն ժամանակահատվածի ցուցանիշը։ Այդ նույն վեց ամիսների ընթացքում, սակայն, Հայաստանի գյուղատնտեսության ոլորտը գրանցել է ամենախորը եռամսյակային անկումը ողջ վիճակագրական պատմության մեջ։ Երկու դիտարկումներն էլ վերաբերում են միևնույն տնտեսությանը, նույն կիսամյակին և պաշտոնական վիճակագրության միևնույն զեկույցին։

Հունիսյան զեկույցի վերանայված ցուցանիշները

Հունիսին մենք հրապարակեցինք «Աճի ալիքը կանգնեց» վերլուծությունը։ Այն հիմնված էր Վիճակագրական կոմիտեի՝ 2026 թվականի առաջին եռամսյակի համար տված 3.95% նախնական գնահատականի վրա, որը մամուլում շրջանառվեց որպես «4 տոկոսանոց աճ» [2]։ Ռուսաստանից եկող ֆինանսական ներհոսքի ալիքը դեռևս շարունակվում է և նոր թափով. օգոստոսյան հրապարակված ցուցանիշներում 2026 թվականի առաջին եռամսյակի աճը 5.15% է։

Մենք համեմատել ենք երկու վիճակագրական հրապարակումները ճյուղ առ ճյուղ։ 2026 թվականի երկրորդ եռամսյակների հրապարակումը ունի հիմնարար վերանայում առաջին եռամսյակի համեմատ։ Ֆինանսական և ապահովագրական գործունեության ծավալները 241.6 մլրդ դրամից հասցվել են 267.6 մլրդ դրամի, ինչի արդյունքում 13.0% անկումը դարձել է 3.6% անկում։ Նշված վերանայումը 26.0 մլրդ դրամ է։ Ընդհանուր տնտեսության ցուցանիշի վերանայումը նույնպես 26.0 մլրդ դրամ է։ Այսինքն՝ Հայաստանի առաջին եռամսյակի ողջ վերընթաց վերանայումը մեկ ճյուղի ցուցանիշի փոփոխությունն է։

Այս հանգամանքն առանցքային նշանակություն ունի, քանի որ հունիսյան վերլուծությունը հիմնված էր հենց ֆինանսական հատվածի տվյալների վրա։ Մեր տնտեսության շարժիչ ուժը բանկային կամ ֆինանսական համակարգն է և առաջին եռամսյակում նախնական գրանցված 13% անկումը նախանշում էր ֆինանսական հոսքերի կանգի մասին։ Այս հոսքերը 2022 թվականից ի վեր եղել են մեր տնտեսության զգալի աճի արտաքին շարժիչ ուժը։ Մենք գրել էինք, որ իրանական կապիտալի հոսքի նվազմանը զուգահեռ՝ բանկային համակարգի կլանիչ ազդեցությունը թուլանում է, ինչը հիմնավորվում էր +27%-ից −13% կտրուկ անկմամբ։ Ներկայումս −13% ցուցանիշը վերանայվել է՝ հասնելով −3.6%-ի, իսկ երկրորդ եռամսյակում ֆինանսական ոլորտն աճել է 22.4%-ով։ Արտերկրից եկող կապիտալի ալիքը դեռ չի սպառվել և 2026 թվականի երկրորդ եռամսյակից նույնիսկ նոր թափ է հավաքել, ինչ երևում է նաև անցած տարվա համեմատ անշարժ գույքի շուկայի և Ռուսաստանից եկող տուրիստների քանակի աշխուժացմամբ։ Ֆինանսական հոսքերը պարզապես դանդաղել են մեկ եռամսյակի ընթացքում՝ ըստ նախնական գնահատականի, որը հետագայում ենթարկվել է վերանայման։

Այս տարի մենք մի քանի անգամ գրել ենք վիճակագրական վերանայումների մասին, և դրանք սովորաբար հակասել են պաշտոնական պատկերին։ Այս անգամ վերանայումը համահունչ է դրան։ Բայց եզրահանգումը երկու դեպքում էլ նույնն է. նախնական գնահատականը վերջնական ցուցանիշ չէ։

Բոլոր ճյուղերի աճը՝ բացառությամբ մեկի

Այսինքն՝ ալիքի նահանջ չի եղել։ Ի՞նչ է տեղի ունեցել իրականում։

Վիճակագրական կոմիտեի կողմից դիտարկվող քսան ճյուղերից տասնյոթում երկրորդ եռամսյակում աճ է գրանցվել։ Միայն երեք ոլորտում է դիտվել անկում, ընդ որում՝ դրանցից երկուսում փոփոխություններն աննշան են եղել. կրթության ոլորտի ծավալները նվազել են 3.8%-ով, իսկ առևտրի ոլորտի ցուցանիշը մնացել է գրեթե անփոփոխ՝ −0.2%։ Երրորդը գյուղատնտեսությունն է, որտեղ անկումը զգալի 15.3% է, կամ ամբողջ գյուղատնտեսության գրեթե մեկ վեցերորդը։

Սա է երկրորդ եռամսյակի տնտեսական պատկերը։ Այս պատկերը ձևավորվել է ոչ թե համակարգային դանդաղում, այլ ընդհանուր տնտեսական ակտիվացում՝ մեկ ոլորտի խորը ճգնաժամով։

Աճի կառուցվածքը

Միայն ֆինանսական համակարգի աշխուժացումն ապահովել է 6.7% աճի 2.2 տոկոսային կետը, որը եռամսյակային աճի մեկ երրորդն է։ Շինարարությունը ներդրել է 1.1 տոկոսային կետ, տեղեկատվությունն ու կապը՝ 1.0, տրանսպորտը՝ 0.8, հանքարդյունաբերությունը՝ 0.7։ Այսինքն՝ եթե չլինեին արտաքին ֆինանսական նոր հոսքերը, տնտեսական աճը կգնահատվեր մոտ 4.5 տոկոս՝ 6.7 տոկոսի համեմատ։ Գյուղատնտեսությամբ, միևնույն ժամանակ, ընդհանուր աճը նվազեցվել է 1.1 տոկոսային կետով։

Այսպես՝ եթե չլիներ Ռուսաստանի կողմից սահմանված տնտեսական արգելքը, ապա ընդհանուր աճը կարող էր կազմել գրեթե 8%։ Գյուղատնտեսությունը, որը ՀՆԱ-ի ընդամենը շուրջ 7%-ն է, իսկ 2016 թվականին՝ 16.4%-ը, մեկ եռամսյակում ավելի քան մեկ ամբողջական տոկոսային կետով կրճատել է տնտեսական աճի հիմնական ցուցանիշը՝ կրճատվելով գրեթե 1/6 մասով։

Իհարկե, պետք է հիշենք, թե ինչից է բաղկացած շինարարության և ֆինանսական համակարգի աճը։ Այդ փողը մի տեղ պիտի ներդրվի, և Հայաստանում ամենալավ ներդրումը շինարարությունն է։ Կապիտալը ներդրվում է, ուղղվում ծառայությունների ոլորտ, բացվում են նոր հաստատություններ, ինչն ամբողջությամբ հաշվառվում է իբրև տնտեսական աճ։ Թեև դա փաստացի աճ է, սակայն մեծամասամբ ձևավորվում է տարանցիկ արտաքին կապիտալի հաշվին, որի ներհոսքը նույնքան դյուրին կարող է վերածվել արտահոսքի։

Գյուղատնտեսության վատագույն եռամսյակը

Անցած տասներկու տարիների ընթացքում գյուղատնտեսությունում նախկինում ևս նկատվել են անկման ժամանակահատվածներ. 2017 թվականի երրորդ եռամսյակում՝ −13.4%, 2018 թվականի վերջին՝ −12.0%։ Այդուհանդերձ, հաշվառված ողջ վիճակագրական շարքում այս տարվա գարնանային անկումն աննախադեպ է։

Իրավիճակի սրությունն առավել ակնառու է նախորդ տարվա բազայի համատեքստում։ 2025 թվականի բոլոր չորս եռամսյակներում գյուղատնտեսությունն աճել է համապատասխանաբար 7.9%, 5.0%, 3.9% և 6.3%-ով։ Այնուհետև, ընթացիկ տարվա առաջին եռամսյակում գրանցվել է 1.6%, իսկ երկրորդում՝ 15.3% անկում։

Նախորդ նյութում մենք նշեցինք, որ գյուղատնտեսության անկումը սկսվել է նախքան սահմանի փակումը, ինչը հաստատվում է առաջին եռամսյակի տվյալներով. ձմռանը՝ մինչ ռուսական կողմի սահմանափակումների կիրառումը, գյուղատնտեսությունն արդեն իսկ բացասական գոտում էր։ Բայց և այնպես, արգելքները կիրառվեցին երկրորդ եռամսյակում, որը համընկնում է բերքահավաքի հիմնական փուլի հետ։ Հունիսին մենք վկայակոչեցինք Կենտրոնական բանկի գնահատականը, համաձայն որի՝ տևական սահմանափակումները կարող են հանգեցնել ՀՆԱ-ի մինչև 2% կորստի [3]։ Ներկայումս առկա են այս կանխատեսումը հաստատող առաջին փաստացի տվյալները։ Մեկ եռամսյակում միայն գյուղատնտեսության ոլորտում գրանցված անկման հետևանքով աճը կրճատվել է 1.1 տոկոսային կետով։

Ընդ որում, վնասը չի սահմանափակվում միայն ֆիզիկական կորստով։ Գյուղացիական տնտեսությունների մեծամասնությունը գործունեությունն իրականացնելու նպատակով ներգրավել է վարկային միջոցներ։ Այդ մարդկանց կեսից ավելին վարկով է աշխատում, և գումարը պետք է վերադարձնեն բանկերին։ Չիրացված բերքը նշանակում է մեկ սեզոնի եկամտի կորուստ։ Մինչդեռ դրա դիմաց ստանձնած վարկային պարտավորությունները տևական են՝ խորացնելով ֆինանսական բեռը։

Երկու տնտեսություն մեկ երկրում

Այն տնտեսական աճի ցուցանիշը, որ մենք ունենք, չի արտացոլում տնտեսության առանձին հատվածները։ Դա միջինացված ցուցանիշ է. տնտեսության մի մասը կարող է անկում ապրել, մի ուրիշ մասը՝ բանկային, ֆինանսական համակարգը, երեք անգամ աճել։

Ութ տարվա կտրվածքով դիտարկելիս՝ նշված միջինացված պատկերը հետևյալն է։

2018 թվականի երկրորդ եռամսյակի համեմատությամբ՝ ընդհանուր տնտեսության ծավալն աճել է 56%-ով։ Տեղեկատվության և կապի ոլորտի ծավալները քառապատկվել են։ Ֆինանսական համակարգը գրեթե եռապատկվել է։ Գյուղատնտեսությունը միակ ճյուղն է, որի ցուցանիշներն ութ տարի շարունակ գտնվել են ելակետային մակարդակից ցածր, և թեև նախորդ ամռանն այն գրեթե վերականգնվել էր, այս տարվա գարնանը դիտված անկումը կրկին վատթարացրել է իրավիճակը։

Տնտեսական աճի բաշխումը տարածքային առումով խիստ անհամաչափ է։ Տեղեկատվական տեխնոլոգիաների, ֆինանսների և հարակից սպասարկման ոլորտները կենտրոնացված են մայրաքաղաքում։ 2018 թվականից այս կողմ հիմնական աճը տեղի է ունեցել Երևանում, Երևանի կենտրոնում, ինչի արդյունքում մայրաքաղաքի մասնաբաժինն ընդհանուր աշխատավարձի ֆոնդում մոտ 72%-ից հասել է շուրջ 80%-ի։ Միևնույն ժամանակ, մարզերի հիմնական տնտեսական հատվածը գյուղատնտեսությունն է։ Սա նաև հանգեցնում է ներքին միգրացիայի. մի քանի տարի շարունակ կորստով աշխատող գյուղատնտեսը ստիպված է լինում թողել իր հողը և տեղափոխվել։

Ինչո՞ւ այս խնդիրը մինչ օրս չի լուծվել։ Ընդհանուր գյուղատնտեսության, անասնաբուծության և հողերի բաշխման գլխավոր պլան չունենք, որ հասկանանք՝ ինչ պետք է արտադրենք։ Յուրաքանչյուր խոշորացված գյուղական համայնք պետք է ունենա գյուղատնտես, անասնաբույժ, արհեստական սերմնավորման տեխնիկ, բիզնես-խորհրդատու և լոգիստիկայի համակարգող։ Լուծված չեն ջրերի կառավարման և կաթիլային ոռոգման խնդիրները։

Որպես այլընտրանքային զարգացման օրինակ կարելի է դիտարկել ծաղկի արտահանման ոլորտը։ 2018 թվականից հետո դրա ծավալներն աճել են շուրջ հինգ անգամ՝ ապահովելով տարեկան 60-70 մլն դոլարի արտահանում գրեթե բացառապես մեկ շուկա։ Սակայն այս աճը մեծամասամբ պայմանավորված էր ոչ թե ներքին արտադրողականության բարձրացմամբ, այլ արտաքին սահմանափակումներով և վերարտահանմամբ։ Աշխարհաքաղաքական պատահականության վրա կառուցված բիզնեսը դադարում է աշխատել այն օրը, երբ աշխարհաքաղաքական ֆինանսական ալիքները փոխում են իրենց ուղղությունը։

Դիտարկվող առանցքային ցուցանիշները

Կառավարության թիրախային տնտեսական աճը տարեկան 7% է, որը սահմանվել է 2021 թվականին. ընդ որում, ՀՀ վարչապետի գնահատմամբ՝ փաստացի ապահովվել է միջինը 7.9% աճ [1]։ 2021-2025 թվականների կտրվածքով այս ցուցանիշը համապատասխանում է իրականությանը։ Մինչդեռ համաճարակին նախորդող՝ 2019 թվականի համեմատությամբ, նույն հաշվարկային մեթոդաբանությամբ միջին աճը 5.2% է։ Երկու ցուցանիշներն էլ վիճակագրորեն ճշգրիտ են և տարբերվում են միայն հաշվարկի մեկնարկային տարվա ընտրությամբ։ Պատմականորեն Հայաստանի երկարաժամկետ տնտեսական աճի միջին տեմպը շուրջ 4.5% է եղել։ Մակրոտնտեսական համակարգերը հակված են վերադառնալու իրենց միջին վիճակագրական մակարդակներին։ Այսպես՝ եթե արտաքին ֆինանսական ալիքների հոսանքը փոխվի, ապա Հայաստանը կկանգնի իր տնտեսական աճի ապահովման խնդրի առջև։

Առանցքային նշանակություն ունի դեկտեմբերին հրապարակվելիք՝ երրորդ եռամսյակի գյուղատնտեսության ցուցանիշը։ Երրորդ եռամսյակը համընկնում է հիմնական բերքահավաքի հետ՝ ծավալային առումով մի քանի անգամ գերազանցելով երկրորդ եռամսյակը, և միաժամանակ առաջին ամբողջական ժամանակահատվածն է, որի ընթացքում ռուսական սահմանափակումները գործել են անընդմեջ։ Եթե երկրորդ եռամսյակի 15.3% անկումը հանգեցրել է տնտեսական աճի 1.1 տոկոսային կետով կրճատման, ապա նույնատիպ դինամիկայի պահպանումը երրորդ եռամսյակում շատ ավելի ծանր մակրոտնտեսական հետևանքների կհանգեցնի։ Բացի այդ, ի տարբերություն ֆինանսական հատվածի, գյուղատնտեսության ցուցանիշները հետադարձ վերանայման ենթակա չեն լինում։ Գյուղատնտեսական արտադրանքը կա՛մ իրացվում է ժամանակին, կա՛մ ֆիզիկապես ոչնչանում է։

Չպետք է շփոթենք լավ միջին ցուցանիշը առողջ տնտեսության հետ։ 6.7% աճը փաստ է։ Փաստ է նաև մարզի դաշտը, որի բերքը ոչ ոք չի գնում։

Վերանայված եռամսյակային աճի վերաբերյալ՝ «Աճի ալիքը կանգնեց» և «Իրանական ալիքը» հրապարակումները։ Մինչև սահմանի փակումը գյուղատնտեսության վիճակի վերաբերյալ՝ «Ճգնաժամ՝ մինչև սահմանի փակումը» և «Արտահանման աճ և կրճատվող դաշտեր»։ Իսկ բուն արգելքի մասին՝ «Բերք՝ առանց հասցեի»։

* Տվյալների աղբյուրը ՀՀ վիճակագրական կոմիտեի ազգային հաշիվներն են (եռամսյակային և տարեկան շարքեր)։ Առաջին հատվածում համեմատվող հունիսյան և օգոստոսյան զեկույցները Վիճակագրական կոմիտեի միևնույն աղյուսակի արխիվացված տարբերակներն են։ Նույն շարքի տարեկան գնահատականի համար տե՛ս մայիսյան վերլուծությունը։ Գծապատկերների սկզբնական կոդը և տվյալների բազան հասանելի են GitHub-ում։

Հղումներ

[1] «2026-ի առաջին կիսամյակում ունեցել ենք արդեն ոչ թե տնտեսական ակտիվության ցուցանիշ, այլ ՀՆԱ-ի 6 տոկոս աճ». Փաշինյան // 1lurer.am, 27 Օգոստոս 2026 — 1lurer.am

[2] 2026 թվականի առաջին եռամսյակում Հայաստանում ՀՆԱ-ն աճել է 4 տոկոսով // Արմենպրես, Հունիս 2026 — armenpress.am

[3] Ռուսական սահմանափակումները կարող են հանգեցնել Հայաստանի տնտեսության մինչև 2% անկման, զգուշացնում է ԿԲ-ն // CivilNet — civilnet.am

[4] Ազգային հաշիվներ, Համախառն ներքին արդյունքն ըստ տնտեսական գործունեության տեսակների, եռամսյակային // ՀՀ վիճակագրական կոմիտե — armstat.am