Ընկերության տվյալները նրա առևտրային գաղտնիքն են: Ստորև շարադրվածը մեր աշխատանքի պայմաններն են, ոչ թե բարի կամքի հայտարարություն: Դրանք արտացոլվելու են պայմանագրի տեքստում:
1․ Տվյալները Ձերն են և մնում են Ձերը
Աշխատանքի ընթացքում մեզ հասանելի ցանկացած տվյալ պատկանում է Ձեզ: Դրանց նկատմամբ իրավունք չենք ձեռք բերում՝ ոչ աշխատանքի ընթացքում, ոչ դրանից հետո:
2․ Համակարգը տեղակայվում է Ձեր ենթակառուցվածքում
Համակարգն աշխատում է Ձեր սերվերի վրա՝ Ձեր տարածքում կամ Ձեր ընտրած սերվերային ծառայության մոտ: Աշխատանքային տվյալները չեն պատճենվում մեր սարքերի կամ մեր հաշիվների վրա:
3․ Ծրագրային կոդը հանձնվում է Ձեզ
Հանձնման պահին ստանում եք ամբողջական ծրագրային կոդը, տվյալների բազայի կառուցվածքը և տեխնիկական փաստաթղթավորումը:
Այս կետը գիտակցված ընտրություն է: Հաճախորդին կախվածության մեջ պահելը մեր աշխատելաոճը չէ: Մեր որակը մեր խոսքի և արժեքների մեջ է:
4․ Հասանելիություն սպասարկման նպատակով
Մշտական հասանելիություն համակարգին կամ Ձեր տվյալներին չունենք:
Երբ խափանման վերացումը պահանջում է մեր միջամտություն, գործում է հետևյալ կարգը՝
- հասանելիությունը տրվում է միայն Ձեր թույլտվությամբ, յուրաքանչյուր դեպքի համար առանձին,
- այն ժամկետային է և ավարտվում է աշխատանքի ավարտին,
- այն տրվում է Ձեր վերահսկողության ներքո՝ Ձեր ցանցի և Ձեր նույնականացման միջոցներով,
- բոլոր գործողությունները գրանցվում են, և գրանցամատյանը մնում է Ձեզ մոտ,
- սպասարկման ընթացքում դիտված տվյալները դուրս չեն բերվում Ձեր ենթակառուցվածքից:
Այս կետը գրված է բացահայտ, որովհետև այլ կերպ ճիշտ չէր լինի: Համակարգը չի կարող միաժամանակ լինել լիովին անհասանելի մեզ համար և վերանորոգելի մեր կողմից:
5․ Երրորդ անձանց չենք փոխանցում
Ձեր տվյալները չեն փոխանցվում երրորդ անձի՝ ոչ մասնակի, ոչ ամբողջական, ոչ վերամշակված տեսքով:
Առանձին՝ արհեստական բանականության մասին: Մեր ներդրած մոդելներն աշխատում են տեղում՝ Ձեր սերվերի վրա: Ձեր տվյալները չեն ուղարկվում արտաքին ծառայությունների, այդ թվում՝ միջազգային AI հարթակների: Արտաքին ծառայություն ուղարկված տվյալի նկատմամբ վերահսկողությունն անվերադարձելի կորչում է:
6․ Գաղտնիության համաձայնագիր
Փոխադարձ գաղտնիության համաձայնագիրը ստորագրում ենք նախքան որևէ տվյալի հետ ծանոթանալը, նախնական գնահատման փուլից առաջ: Անվճար նախնական քննարկման ընթացքում Ձեզանից տվյալ չենք խնդրում:
7․ Միայն անհրաժեշտ տվյալներ
Մշակման փուլում օգտագործում ենք միայն կոնկրետ խնդրի համար անհրաժեշտ տվյալները: Հնարավորության դեպքում աշխատում ենք ապանձնավորված կամ նմուշային տվյալների վրա: Աշխատանքային պատճենները ջնջում ենք հանձնումից հետո և տալիս գրավոր հաստատում:
8․ Հրապարակումներ՝ միայն Ձեր թույլտվությամբ
Ձեր ընկերության անունը, տվյալները կամ նախագծի մանրամասները չեն օգտագործվում մեր հրապարակումներում, ներկայացումներում կամ կայքում առանց Ձեր առանձին համաձայնության:
Մեր շաբաթական տնտեսական վերլուծությունները հենվում են բացառապես հանրային աղբյուրների վրա: Հաճախորդների տվյալները դրանցում չեն օգտագործվում:
9․ Մրցակցային սահմանափակում
Պայմանագրի գործողության ընթացքում և դրանից հետո 12 ամսվա ընթացքում նույն նշանակության համակարգ չենք կառուցում Ձեր ուղղակի մրցակիցների համար՝ առանց Ձեր համաձայնության: Մրցակիցների ցանկը սահմանվում է պայմանագրով:
10․ Այս հռչակագրի կարգավիճակը
Վերոնշյալ կետերը տեղափոխվում են պայմանագրի տեքստ: Եթե որևէ կետ Ձեր անվտանգության քաղաքականությանը չի համապատասխանում, այն քննարկելի է մինչև ստորագրումը, ոչ թե դրանից հետո:
Աղասի Թավադյան
հիմնադիր և ղեկավար, «Տվյալ» ընկերություն